Hezkuntza ezinbesteko tresna da etorkizuneko jendartea eraikitzeko. Ikastolen Elkarteko ikas-material propioak eta korronte pedagogiko berriak aztertu, hausnartu, gure behar eta errealitatera egokitu eta abian jartzeko ahalegin etengabearen fruitua da Orereta Ikastolaren hezkuntza-proiektua. Proiektu propioa, haur eta gaztetxoen ongizatea oinarri eta autonomia helburu dituena.

Espazioa, hezkuntza-beharretara egokitua

Orereta Ikastolako Haur Hezkuntzako proiektu pedagogikoaren oinarria haurren ongizatea eta konfiantza dira; haien autonomia, berriz, helburua. Haurra gaitasunez betetako pertsona dela eta ikasteko berezko gaitasuna duela sinetsita, behatzeko eta lan egiteko modu berritzaileak jorratzen ari gara. Bide horretan irmo aurrera egin ahal izateko, espazioak ere horri erantzuteko prest daude: Esmalteriako eraikina erabat eraberrituta dago eta Linokoa egiteko proiektua martxan da.

Ongizateak giro eta ingurugiro osasungarrien beharra du eta hori haurrek beraiek, familiek, profesionalek, materialek eta, batez ere, berdinekiko harremanek aberasten dute.

Jolasa da beste zimendu garrantzitsu bat. Haurrak airea bezainbeste behar du jolasa bizitzen ari den mundua ulertu eta kudeatzen ikasteko. Jolasaren eta esperimentazioaren bitartez norberaren erritmoak errespetatzea lortzen da; autonomia, talde-lana eta harremanak aberasten dira, eta, guztiaren gainetik, haurrak bizitzan aurrera egiteko beharrezkoa izango duen konfiantza garatzen du.

Espazioen antolaketa funtsezkoa da horretarako guztirako, giro eta ingurugiro osasungarrirako zein jolaserako eta esperimentaziorako.

Lehen Hezkuntza (6-12 urte)

Jakitetik jardutera, aurrera egiteko

Konpetentzietan oinarrituta egiten dugu lan. Jakitearen paradigmatik egitearen, erabiltzearen, paradigmara egin dugu jauzia. Izan ere, Ikastolaren egitekoa ez da irakastea soilik, pertsona osoaren garapenaz arduratzea baizik. Haurraren alderdi fisikoa, kognitiboa, komunikatiboa, soziala eta afektiboa izaten ditugu kontuan Ikastolan: pentsatzen eta ikasten ikasten dugu, elkarrekin egiten, norbera izaten, eta ekiten nahiz egiten ikasten dugu. Finean, gaztetxoak bizitza osoan ikasten jarraitzeko prestatzen ditugu, aurrera egiten ikasteko.

Ikaskide proiektua da gure lanaren oinarrietako bat: profesionalak zein ikasleak elkarlanean, elkarrekin, jardutea dugu xede; horretara bideratzen ditugu ahaleginak. Elkarrekin gehiago eta hobeto ikasten dela uste dugu. Finean, balio kooperatiboak bultzatuz, ikasle guztien ikaste-prozesua hobetzeko helburua duen berrikuntza proiektua da Ikaskide. Besteekin elkarlanean ikasiz, hainbat konpetentzia garatzea lortzen dute ikasleek.

Lehen Hezkuntzako azken zikloan, Ikastolek berariaz sortu eta garatutako EKI proiektuarekin egiten dugu lan. Proiektu berritzailea da EKI, konpetentzietan oinarritua eta integrazioaren bitartez Euskal Curriculuma garatzen duen proiektu berritzailea.

EKI proiektuak pertsonaren garapen osoa eta integrala du helburu. Egoera errealen aurrean, ikasleak egoera horretan behar dituzten baliabideak bilatzen eta erabiltzen ohitzen dira, bakarrik nahiz talde-lanean, irtenbideak aurkitzen dituzte, eta ikasi dutena egoera berrietan baliatzen dute. Derrigorrezko Bigarren Hezkuntza osoan ere EKIrekin egiten dugu lan.

Aipatu, baita ere, konpetentzia digitalaren lanketa unitate didaktiko guztietan txertatu dela. IKTak hezkuntzaren zerbitzura jarri eta, haien bitartez, onura pedagogikoak indartu dira.

Horrez gain, behar berezi edota jakinak dituzten ikasleentzako programa eta egitasmoak daude martxan Ikastolan.

Ikasgelak atari zabalean

Ikastola inguru berdean, mendialdean, egoteak konpetentziak ikasgelatik kanpo ere lantzen laguntzen digu.

Baratzeko proiektua da horren adibide. Ortuaren erritmoez ohartzeko, natura zein emankorra eta jakintsua den ezagutzeko, gure ingurua zaintzearen garrantziaz konturatzeko, lanabesak egoki eta zuzen erabiltzen ikasteko, euskarazko hiztegia aberasteko zein talde lanaren garrantziaz ohartzeko aukera bikaina eskaintzen digu Añabitarteko baratzeak. Autokonpostarako guneak ere badira Ikastolan.

KIVa programa, eskola-jazarpenaren prebentzio eta kudeaketarako egitasmo berritzailea

KIVa programa bullying edo eskola-jazarpenaren prebentzio eta kudeaketarako egitasmo berritzailea da, jazarpenaren beraren eta haren mekanismoen gaineko punta-puntako ikerketak egin eta baliatuz Finlandiako Turku Unibertsitateak garatua, herrialde hartako Hezkuntza eta Kultura Sailaren babesarekin.

KIVan ekintza orokorrak eta berariazkoak uztartzen dira. Lehenak (KIVa curriculum-a) ikasle guztiei zuzenduta daude eta jazarpenaren prebentzioa dute helburu. Berariazko ekintzak, berriz, jazarpen-kasuak hautematean jartzen dira martxan. Jazarpena kudeatzeko eta gelditzeko neurriak dira.

KIVak ikastetxe bakoitzaren egoeraren etengabeko jarraipena egiteko baliabideak eskaintzen ditu. Horiek horrela, programaren ezarpenaren eta haren emaitzen berri jasotzen dugu. Emaitzak positiboak dira.

Lehen Hezkuntzan hasi ginen KIVa programa lantzen eta, sendotzen ari dela ikusita, Derrigorrezko Bigarren Hezkuntzan ere hasi da Orereta Ikastola programa abian jartzen.

Batxilergoa (16-18 urte)

Azken pausoa, bizitzaren eskolan aurrera egiteko

Oiartzo Ikastolan amaitzen dute gure ikasleek Ikastolako ibilbidea. Oiartzungo Haurtzaro Ikastolak eta Orereta Ikastolak sortutako fundazioa da Oiartzo. 90. hamarkadaren amaieran ireki zituen ateak eta batxilergo euskalduna, kalitatezkoa eta aukera zabalekoa eskaintzea du xede. Haurtzaro eta Orereta Ikastolak bezalaxe, Oiartzo ere Euskal Herriko Ikastolen Elkarteko kide da, kalitatezko euskarazko hezkuntzaren berme.

Ikasleekiko hurbiltasuna, jarraipen gertua eta ondorengo ikasketetarako zein ibilbide profesionalerako aholkularitza eta orientazio pertsonalizatua eskaintzen ditu Oiartzok.

Eleaniztasuna, ikas-bizitzan egindakoaren uzta

Haur Hezkuntzatik Batxilergora arte lantzen da eleaniztasuna Ikastolan, euskara zutabe hartuta. Haur Hezkuntzatik lantzen da ingelesa, eta frantsesa hautazko irakasgaia da Bigarren Hezkuntzan. Egindako lanaren agiri ofizialak lortzeko aukera eskaintzen da Batxilergoan: HABEren 3. euskara-maila lortzeko prestaketa (AEKren laguntzaz) eta ingeleseko B2 titulua lortzeko Oxfordeko azterketa egiteko aukera (hala nahi duen herritar ororentzat irekia) eskaintzen dira, hain justu.